मंठा: लाईट ऑफ लाईफ ट्रस्टच्या वतीने जालना व मंठा पालकांसाठी पालक मेळावा आयोजित करण्यात आला होता. हा पालक मेळावा लाभार्थी विद्यार्थींच्या पालकांसाठी आयोजन करण्यात आला होता. हा पालक मेळावा जालना व अहमदनगर जिल्ह्याचे वरिष्ठ प्रकल्प अधिकारी श्री. जोमा मस्ती सर यांच्या मार्गदर्शनाखाली आयोजित करण्यात आला होता. या पालक मेळाव्यासाठी एक दिवस बहरण्याचा ही संकल्पना घेऊन पालकांसाठी दिवसभरात वेगवेगळ्या प्रकारचे खेळ घेऊन त्याना आनंद भेटेल अशा प्रकारे या पालक मेळाव्याचे स्वरूप होते. हा पालक मेळावा जालना व मंठा या दोन सेंटरमध्ये घेण्यात आला. या पालक मेळाव्यासाठी विविध खेळ ठेवण्यात आले होते, त्यामध्ये विविध गीतांचे गायन, लिंबू बेलन खेळ व संगीत खुर्ची असे विविध खेळाचे स्वरूप होते. या विविध खेळामध्ये सहभागी होऊन पालकांनी मनसोक्त आनंद घेतला. यामध्ये ज्या पालकांना सहभागी होऊन क्रमांक मिळवला आहे, अशा पालकांना बक्षिसे देण्यात आली. या मेळाव्यासाठी आलेल्या पालकांसाठी संस्थेच्या वतीने जेवणाचे ही नियोजन करण्यात आले होते. या कार्यक्रमाच्या माध्यमातूनच पालकांना विविध लहानांचे खेळ खेळायला मिळाले व पालकांनी आनंद घेतला. या कार्यक्रमाच्या प्रसंगी या संस्थेचे श्री. सुभाष क्षिरसागर, श्री. सिध्दार्थ पवार, श्रीमती कौशल्या खरात, श्री. कैलास कोल्हे, श्री. निलेश चव्हाण, श्री. समाधान गडदे, श्री. शिवाजी काजळकर, श्री. जितेंद्र खिल्लारे, श्री. प्रल्हाद खरात, श्री. जनार्दन राठोड, श्रीमती रूपाली जाधव, श्री शेळके इत्यादींची व पालकांची उपस्थिती होती.

नवी दिल्ली: शशी थरूर राष्ट्रवादी काँग्रेसमध्ये दाखल झाले तर आम्ही त्यांचे मनापासून स्वागत करू. असं पीसी चाको यांनी म्हंटल. शशी थरूर कॉंग्रेसशी फारकत घेत असून त्यांना राष्ट्रवादीची आफर असल्याचे समजते. काँग्रेस पक्षाने त्यांना नाकारले तरी शशी थरूर हे तिरुअनंतपुरमचे खासदार राहतील. काँग्रेस थरूर यांच्याकडे का दुर्लक्ष करत आहे हे मला कळत नाही असेही ते म्हणाले. काँग्रेस अध्यक्षपदाची निवडणूक लढवलेलं खासदार शशी थरूर हे काँग्रेस मध्ये नाराज असल्याची चर्चा सुरु आहे. याशिवाय त्यांना केरळ मध्ये पक्षांतर्गत विरोधाचा सुद्धा सामना करावा लागतोय. त्यातच आता राष्टवादी काँग्रेसने थरूर यांना थेट ऑफर दिली आहे. शशी थरूर यांनी राष्ट्रवादीमध्ये यावे, तुमची तिरुअनंतपुरमची खासदारकी कायम राहील अशी ऑफर केरळ राष्ट्रवादी काँग्रेसचे अध्यक्ष पीसी चाको यांनी दिली आहे. दरम्यान, चाको यांच्या या ऑफरनंतर खुद्द शशी थरूर यांनीदेखील प्रतिक्रिया दिली आहे. मी राष्ट्रवादीमध्ये प्रवेश करणार नाही. पक्षप्रवेशाबाबत पीसी चाको यांच्याशी कोणतीही चर्चा झालेली नाही,’ असे शशी थरुर म्हणाले आहेत. मी केरळ युनिटमधील कोणावरही नाराज नाही. ते पक्षातील कोणाच्याही विरोधात बोलले नाहीत किंवा सूचनांविरुद्ध कृतीही केली नाही. असेही ते म्हणाले.

फुले सेलिब्रेशन कलमना मार्केट रोड येथे राष्ट्रवादी काँग्रेस कार्यकर्त्यांचा मेळावा. नागपूर शहर अध्यक्ष दुनेश्र्वर पेठे यांचे नेतृवात राष्ट्रवादी काँग्रेस कार्यकर्त्यांचा मेळावा घेण्यात आला. या मेळाव्यात माजी गृहमंत्री आणि राष्ट्रवादी काँगेसचे ज्येष्ठ नेते आमदार दिलीप वळसे पाटील, माजी मंत्री रमेशचंद्रजी बंग, नागपूरचे निरीक्षक राजेंद्र जैन यांच्या उपस्थितीत समाजसेविका सुनिता येरने यांनी राष्ट्रवादी काँग्रेस मध्ये प्रवेश घेतला. माजी मंत्री दिलीप वळसे पाटील यांनी नागपूर शहर उपाध्यक्ष या पदावर विराजमान केले. या नवीन राजकीय जीवनाकरीता, या मेळाव्यात पूर्व नागपूरचे अध्यक्ष गुलशन मुनियार, शहर उपाध्यक्ष रविनेश पांडे, शहर उपाध्यक्ष अश्विन जवेरी, शहर, महेंद्र भांगे उत्तर नागपूर अध्यक्ष, प्रवक्ता सतीश इटकेलवार, शहर उपाध्यक्ष रवींद्र इटकेलवार, शहर महासचिव आकाश थेटे, रिजवान अन्सारी, राजा बेग, शोभाताई येवले, रीताताई शेंडे, संगीता अंबरे, सुनील आचार्य, युसुफ अली आणि मोठ्या संख्येने कार्यकर्ते उपस्थित होते.

विशाळगड: अफझलखानाला मारल्यानंतर लगेचच महाराजांनी स्वराज्य विस्तारासाठी आगेकूच केली आणि कोल्हापूर प्रांतासह पन्हाळगड व खेळणा किल्ला जिंकून घेतला. खेळणा किल्ल्याचे नाव महाराजांनीच "विशाळगड" ठेवले. विशाळगडाच्या मजबुतीसाठी महाराजांनी काही हजार होन खर्च केल्याच्या नोंदीही सापडतात. पन्हाळगडावरचा वेढा फोडून आलेल्या महाराजांना याच विशाळगडाने सुरक्षितपणे आपल्या कुशीत सामावून घेतले. छत्रपती शिवाजी महाराज, छत्रपती संभाजी महाराज, छत्रपती राजाराम महाराज, रणरागिणी महाराणी ताराराणी साहेब, आहिल्याबाई राणीसाहेब, या सर्वांचं वास्तव्य या गडावर होतं. राजर्षी शाहुपुत्र राजाराम महाराज यांनी जिर्णोद्धार केलेली आहिल्याबाई राणीसाहेबांची समाधी, घोडखिंडीच्या रणसंग्रामात धारातीर्थी पडलेले बाजीप्रभू, आणि फुलाजीप्रभू यांची समाधी याच गडावर आहे. स्वराज्यात महत्त्वाचे स्थान असलेला विशाळगड आज वेगळ्याच कारणांसाठी प्रसिध्द आहे, याची मनाला खंत वाटते. गडावर अतिक्रमण मोठ्या प्रमाणात झाले आहे. अनधिकृत बांधकाम, अस्वच्छता, पार्ट्या, अवैध धंदे, दुर्गंधीचे साम्राज्य, आणि कचऱ्याचे ढिग यांमुळे गडाचे गडपण हरवले आहे, याला जबाबदार कोणाला धरायचे? नोटीसांचा खेळ करणाऱ्या प्रशासनाला? दुर्लक्ष करणाऱ्या राज्यकर्त्यांना? का मौजमजा करण्यासाठी येणाऱ्या पर्यटकांना? अतिशय प्रतिकूल परिस्थितीतही काही दुर्गप्रेमी संस्था, संघटना, व्यक्ती विशाळगडाच्या रक्षणासाठी कार्यरत आहेत. या सर्वांचे करावे तितके कौतुक कमी आहे. राज्य पुरातत्त्व खात्याच्या ताब्यात असलेल्या गडावर ग्रामपंचायतीच्या अक्षम्य दुर्लक्षामुळे हे सर्व घडले आहे. यासंदर्भात बुधवार, दि. ७ डिसेंबर रोजी प्रशासनाबरोबर बैठक बोलाविण्यात आलेली आहे. यावेळी गडावर संवर्धनाचे काम करणाऱ्या संस्था, संघटनांचे प्रतिनिधी, शासकीय अधिकारी उपस्थित राहणार आहेत.